Ingibjörg Isaksen, þingmaður Norðausturkjördæmis, hefur boðið sig fram til formennsku í Framsóknarflokknum. Hún er sú fyrsta til að tilkynna framboð í embættið, sem kosið verður um á flokksþingi Framsóknar dagana 14. og 15. febrúar. Ný stjórn flokksins verður kjörin á þinginu. Ingibjörg, sem gegnir nú embætti þingflokksformanns Framsóknar, greindi frá ákvörðun sinni í færslu á Facebook.
Núverandi formaður flokksins, Sigurður Ingi Jóhannsson, hefur tilkynnt að hann hyggist ekki sækjast eftir endurkjöri. Þá hafa Lilja Dögg Alfreðsdóttir og Willum Þór Þórsson verið orðuð við framboð til formanns, en hvorugt þeirra hefur enn staðfest ákvörðun sína.
Ingibjörg hefur setið á Alþingi fyrir Framsókn frá árinu 2021. Áður sat hún í sveitarstjórn Eyjafjarðarsveitar og bæjarstjórn Akureyrar. Lengst af starfaði hún sem kennari og framkvæmdastjóri heilbrigðisstofnunar. Í yfirlýsingu sinni segir Ingibjörg flokkinn standa á tímamótum – og íslenskt samfélag sömuleiðis. Hún bendir á að kastljósið hafi í auknum mæli beinst að bágri stöðu barna og ungmenna, bæði innan menntakerfisins og víðar.
