Blaðamaður Húsavík.com leit við á skrifstofum stéttarfélaganna og hitti þar fyrir Aðalstein J. Halldórsson, oddvita Tjörneshrepps og fyrsta mann á T-listanum í síðustu tveimur sveitarstjórnarkosningum í Tjörneshreppi. Listinn var í bæði skiptin einn í kjöri, eins og raunar oft áður í hreppnum.
Oddvitinn segist ekki reikna með mótframboði í ár. „Það er ekki byrjað að stilla upp, en ég á ekki von á miklum vendingum,“ segir Aðalsteinn.
Hann viðurkennir að hugur sinn hafi fremur verið í pólitíkinni í Norðurþingi í gær, enda bárust þaðan nokkur tíðindi þegar greint var frá því að Guðmundur Halldórsson málari skipaði fjórða sæti á V-lista Velferðar.
„Ég las það fyrst á Húsavík.com að bróðir minn væri kominn í framboð. Þetta kom mér stórkostlega á óvart og ég er enn að jafna mig eftir þessi tíðindi,“ sagði oddvitinn glettinn.
T-listinn á að baki áratuga sigurgöngu í Tjörneshreppi. Síðast voru tveir listar í kjöri til hreppsnefndar árið 1978. Þá leiddi Úlfur Indriðason, bóndi á Héðinshöfða, H-listann en Sigrún Ingvarsdóttir, húsfreyja á Héðinshöfða, leiddi þá I-listann.
T-listinn í síðustu kosningum var þannig skipaður:
| 1. Aðalsteinn J. Halldórsson bóndi og oddviti Ketilsstöðum |
| 2. Jón Gunnarsson bóndi Árholti |
| 3. Katý Bjarnadóttir lögfræðingur Héðinshöfða 2 |
| 4. Smári Kárason sveitarstjórnarmaður Breiðuvík |
| 5. Sveinn Egilsson bóndi Sandhólum |
| 6. Jónas Jónasson bóndi Héðinshöfða |
| 7. Sigurbjörg Sveinbjörnsdóttir bóndi Mýrarkoti |
| 8. Eyrún Dögg Guðmundsdóttir húsmóðir Árholti |
| 9. Sigríður Hörn Lárusdóttir þjónustufulltrúi |
| 10. Marý Anna Guðmundsdóttir húsmóðir Syðri-Sandhólum |
Ljósmyndir: Hörður Jónasson / Heiðar Hrafn Halldórsson
