Óskalistinn með fullmannað lið til leiks í Norðurþingi

Ó-listinn hefur nú fullmannað framboðslista sinn fyrir sveitarstjórnarkosningarnar í Norðurþingi í vor. Í fyrsta sæti listans er Ómar Gunnarsson málari á Kópaskeri, sem farið hefur fyrir undirbúningi framboðsins.

Í öðru sæti er Gísli Þór Briem starfsmaður HSN og sjálfstætt starfandi atvinnurekandi á Raufarhöfn, og í þriðja sæti Einar Sigurðsson útgerðarmaður á Raufarhöfn. Í fjórða sæti er Ann-Charlotte Fernholm bóndi í Öxarfirði, og í fimmta sæti Elvar Már Stefánsson verkamaður á Kópaskeri.

Forsvarsfólk framboðsins segja meginmarkmið þess vera að fá fleiri sjónarhorn inn í umræðu og ákvarðanatöku í sveitarfélaginu.

„Sem fyrr er aðal tilgangur framboðsins að fá fleiri vinkla á málefnin, beint úr samfélögunum. Í stóru og víðfeðmu sveitarfélagi þarf að mörgu að gæta og mikilvægt að sem flestar raddir komi að sem flestum málum,“ segir í tilkynningu frá framboðinu.

Húsavík.com ræddi við Ómar Gunnarsson oddvita Ó-listans á dögunum og sagði hann þá að framboðið hefði sprottið upp úr umræðum fólks á austursvæði sveitarfélagsins sem teldi mikilvægt að fleiri raddir kæmu að borðinu í málefnum Norðurþings. „Við viljum sjá fleiri raddir koma inn í sveitarstjórn og nefndir héðan af svæðinu, en ekki bara þessa einn til tvo frambjóðendur sem eru settir á lista fyrir kosningar, meira til skrauts,“ sagði Ómar.

Hann sagði jafnframt að margir hefðu orðið þreyttir á því að landsmálaflokkar réðu ferðinni í sveitarstjórnarmálum. „Það eru margir komnir með leið á þessum landsmálaflokkum sem er verið að troða inn í sveitarstjórnarkerfið, sérstaklega í svona fámennu samfélagi eins og Norðurþing er,“ sagði Ómar.