Um tíundi hver farþegi sem nýtir sér beint millilandaflug til Akureyrar heimsækir einnig Austurland og er almenn ánægja meðal gesta með bæði svæðin. Þetta kemur fram í nýrri skýrslu Rannsóknarmiðstöðvar ferðamála, „Beint frá Akureyri“, sem byggir á landamærakönnun meðal erlendra ferðamanna veturinn 2024–25. Austurglugginn greinir frá.
Fram kemur að framboð flugs hafi veruleg áhrif á ferðamynstur gesta og hvort þeir heimsæki fleiri landshluta. Samkvæmt skýrslunni dvöldu um 90% ferðamanna eingöngu á Norðurlandi en um 10% ferðuðust einnig til Austurlands, einkum farþegar frá Zürich og Amsterdam.
Gunnar Gunnarsson ritstjóri á Egilsstöðum er með ítarlega samantekt í nýjasta tölublaði Austurgluggans. Eins og Austurglugginn greinir frá hefðu um helmingur þeirra sem heimsóttu Austurland ekki komið þangað án beinu fluganna til Akureyrar. Þá kemur fram að 66% gesta sem ferðuðust austur lýstu upplifun sinni sem frábærri og nefndu margir norðurljósin sem hápunkt ferðarinnar.
Ljósmynd: Eysteinn Guðni Guðnason, birt með Creative Commons leyfi
