Fréttavefurinn Húsavík.com er skráður fjölmiðill hjá Fjölmiðlanefnd og ritstjórnarstefna miðilsins byggir á ákvæðum fjölmiðlalaga nr. 38/2011, einkum um ritstjórnarlegt sjálfstæði, ábyrgð og fagleg vinnubrögð. Markmið stefnunnar er að tryggja trúverðuga, sjálfstæða og vandaða fréttamiðlun í þágu almennings.
1. Hlutverk og starfssvæði miðilsins
Húsavík.com er sjálfstæður frétta- og upplýsingamiðill sem sinnir fyrst og fremst Þingeyjarsýslum og Norðurlandi, með megináherslu á Húsavík og nærsamfélag þess.
Miðillinn fjallar um samfélagsmál, stjórnmál, atvinnulíf, menningu, íþróttir, umhverfi og mannlíf svæðisins, með það að markmiði að efla lýðræðislega umræðu, upplýsta ákvarðanatöku og samfélagslega samheldni.
Fréttum og efni er miðlað á íslensku, ensku og pólsku, eftir eðli mála og markhópum, með sömu kröfum um nákvæmni, sanngirni og fagmennsku óháð tungumáli.
Tekið er við aðsendum skoðanagreinum og eru þær ætíð merktar sem slíkar, enda fara þar ákveðnar skoðanir fólks sem skrifar undir eigin nafni eða nöfnum. Vefurinn birtir ekki efni undir dulnefni, nema ef um er að ræða samkeppni í ritsmíðum (t.d. smásagnasamkeppnir) þar sem nafnleyndar er krafist um tíma vegna vinnu dómnefndar, en slíkt efni skal merkt réttum höfundi þegar dómnefnd hefur lokið störfum.
2. Ritstjórnarlegt sjálfstæði
Ritstjórnarlegt sjálfstæði Húsavík.com felst í því að ritstjóri ber ábyrgð á öllu efni miðilsins og tekur ákvarðanir um efnisval, framsetningu og forgangsröðun án afskipta eigenda, auglýsenda, hagsmunaaðila eða annarra utanaðkomandi aðila.
Blaðamönnum og öðrum sem vinna efni fyrir miðilinn verður ekki gert að vinna verkefni sem ganga gegn sannfæringu þeirra, samvisku eða faglegum viðmiðum.
3. Ritstjórnarstefna og fagleg viðmið
Efni Húsavík.com skal byggja á:
sannleika, nákvæmni og áreiðanleika upplýsinga
vönduðum heimildum og gagnrýnni heimildavinnu
sanngirni og jafnræði í umfjöllun
skýrum aðgreiningum milli frétta, skoðanaefnis og auglýsinga
Ritstjóri ber ábyrgð á túlkun ritstjórnarstefnunnar, daglegu fréttamati og endanlegri birtingu efnis. Blaðamenn hafa tillögurétt um efni og nálganir, en endanleg ákvörðun er í höndum ritstjóra.
Sé efni breytt verulega frá upphaflegri vinnu blaðamanns á hann rétt á skýringu á þeim breytingum.
4. Vinnubrögð og framsetning efnis
Miðillinn leggur áherslu á:
gagnsæi í vinnubrögðum
leiðréttingu villna þegar þær koma í ljós
skýra merkingu auglýsinga, kostaðs efnis og samstarfsverkefna
5. Fjöltyngd miðlun
Þegar efni er birt á fleiri en einu tungumáli skal þess gætt að inntak, merking og samhengi sé sambærilegt. Þýðingar skulu vera vandaðar og endurspegla efni frumtexta án rangfærslna eða efnislegrar skekkju.
6. Siðferðileg ábyrgð
Húsavík.com fylgir almennum siðareglum blaðamennsku, þar á meðal sérstaka varfærni í umfjöllun um börn, viðkvæma hópa og sakamál.
Húsavík, 3. desember 2025
Örlygur Hnefill Örlygsson, framkvæmdastjóri