Blaðamannafundur ríkisstjórnarinnar vegna þjóðaratkvæðagreiðslu um aðildarviðræður við ESB hófst rétt í þessu og er hægt að fylgjast með honum í beinni útsendingu á RÚV. Á fundinum kom fram að ríkisstjórnin hyggst leggja til að þjóðaratkvæðagreiðsla fari fram þann 29. ágúst næstkomandi, þar sem landsmenn verði spurðir einnar spurningar: „Á að halda áfram viðræðum um aðild Íslands að Evrópusambandinu?“
Kristrún Frostadóttir forsætisráðherra opnaði fundinn og sagði að mikil ólga væri nú í alþjóðamálum, en að samningsstaða Íslands væri sterk. Kristrún sagði skýrt að þjóðin hefði endanlegt vald í þessu máli.
Þorgerður Katrín Gunnarsdóttir utanríkisráðherra sagði jafnframt að ef þjóðin segi já í komandi þjóðaratkvæðagreiðslu muni ríkisstjórnin aldrei skrifa undir samning sem feli í sér afsal á auðlindum þjóðarinnar. Inga Sæland félags- og húsnæðismálaráðherra sagði að ríkisstjórnin treysti þjóðinni til að taka afstöðu í málinu. „Við treystum þjóðinni okkar af öllu hjarta,“ sagði hún á fundinum.
Áhrif aðildar á landsbyggðir
Árið 2008 stóð Samfylkingin fyrir stóru málþing á Húsavík þar sem fjallað var um Evrópusambandið og hugsanleg áhrif aðildar Íslands að sambandinu á byggðir landsins. Staða byggðamála á Íslandi er um margt sérstök í samanburði við nágrannalöndin og mörg aðildarríki ESB. Þrátt fyrir mikla umræðu og ýmsar tilraunir stjórnvalda til að sporna við veikingu byggða utan höfuðborgarsvæðisins hefur árangurinn oft á tíðum verið takmarkaður.
Sigmundur Davíð Gunnlaugsson, formaður Miðflokksins og þingmaður Norðausturkjördæmis, segir málið allt boða uppgjöf. „Nú skal Íslandi komið inn í Evrópusambandið með blekkingum, eitt skref í einu, endurnýting á hinni fáránlegu kenningu að hægt sé að kíkja í pakkann,“ segir Sigmundur. Hann segir Miðflokkin munu berjast gegn þessu máli í hverju skrefi.
Benedikt Valur Jakobsson, sveitarstjórnarfulltrúi Samfylkingarinnar segir í samtali við Húsavík.com sjálfsagt og eðlilegt að þjóðin fái að kjósa um hvort farið verði í viðræður.
Minni stuðningur við þjóðaratkvæðagreiðslu á landsbyggðum
Samkvæmt nýrri könnun Gallup, sem greint var frá í aukafréttatíma RÚV í hádeginu, eru 57% landsmanna hlynnt því að halda áfram viðræðum við Evrópusambandið en 30% andvíg. Andstaða við viðræðurnar er meiri meðal karla en kvenna. Þá kemur einnig fram að stuðningurinn er talsvert meiri á höfuðborgarsvæðinu en á landsbyggðinni, en 61% íbúa höfuðborgarsvæðisins eru hlynnt viðræðum en 35% íbúa landsbyggðanna.
