Slökkvilið Norðurþings birti í dag ársskýrslu sína fyrir árið 2025, en slökkviliðið var umtalsvert í fréttum á liðnu árinu, bæði vegna launamála starfsmanna og umræðu um fjárfestingar í sveitarstjórn Norðurþings. Þá vakti slökkviliðið athygli um land allt á gamlárskvöld þegar gróðureldur kom upp í Húsavíkurfjalli og tókst með snarræði og kraftmiklum aðgerðum liðsins að koma í veg fyrir mikið tjón.
„Það er góður andi í liðinu og við horfum björtum augum til ársins 2026,“ segir Henning Þór Aðalmundsson í samtali við Húsavík.com, en hann tók við stjórn slökkviliðsins á árinu. „Alls voru haldnar 33 æfingar á árinu, 18 æfingar á Húsavík, 7 á Kópaskeri og 8 á Raufarhöfn. Þá tók slökkviliðið þátt í forvarnarstarfi á landsvísu, sem fólst meðal annars í heimsóknum í leik- og grunnskóla sveitafélagsins“ segir Henning.
Í ársskýrslunni kemur fram að Slökkvilið Norðurþings starfar á einu stærsta og víðfeðmasta starfssvæði landsins, sem nær að Klambraseli í Reykjahverfi og austan Jökulsár á fjöllum að Biskupshálsi. Til norðurs er svæðið óslitið 130 kílómetra norður fyrir Ormarsá við Raufarhöfn. Um 50 slökkviliðsmenn eru í liðinu á þremur starfsstöðvum, á Húsavík, Kópaskeri og Raufarhöfn, þar sem stöðin á Húsavík gegnir hlutverki baklands í stærri útköllum.
Hægt er að lesa ársskýrslu slökkviliðsins hér:
[PDF] Ársskýrsla Slökkviliðs Norðurþings 2025
