Byggðarráð Norðurþings gagnrýnir harðlega að í nýrri fjármálaáætlun ríkisins sé lagt til að 100 milljóna króna viðbótarframlag til Flugþróunarsjóðs verði fellt niður, á sama tíma og ríkisstjórnin boðar aukna dreifingu ferðamanna um landið og meiri stuðning við millilandaflug um aðra flugvelli en Keflavík.
Byggðarráð samþykkti bókun á fundi sínum í gær í tengslum við kynningu á skýrslu Flugklasans Air 66N um starf klasans undanfarna mánuði.
„Ég vil byrja á að segja það verið unnið mjög gott starf innan flugklasans í markaðssetningu Akureyrarflugvallar fyrir millilandaflug og Norðurlands sem áfangastaðar. Sú vinna hefur skilað þeim árangri að það er beint flug frá Akureyri til Bretlands, Hollands og Sviss tímabundið ár hvert auk tilfallandi stakra helgarferða, sem við njótum sem hér búum, t.d. til Póllands, Króatíu svo eitthvað sé nefnt,“ segir Helena Eydís Ingólfsdóttir, varaformaður byggðarráðs, í samtali við Húsavík.com.
Hún bendir á að sveitarfélög á Norðurlandi ásamt landshlutasamtökum hafi um árabil lagt fé í markaðssetningu Akureyrarflugvallar og að verkefnið sé langtímaverkefni.
„Verkefnið er langtímaverkefni til að flugleiðir eins og þessar festist í sessi, með tilheyrandi ávinningi samfélagsins bæði varðandi atvinnuuppbyggingu en ekki síður búsetugæði, og þær hafa notið stuðnings úr Flugþróunarsjóði sem er vel og er tilgangur sjóðsins.“
Í bókun byggðarráðs segir að vinna Flugklasans Air 66N sé í fullu samræmi við áherslur ríkisstjórnarinnar eins og þær birtast í nýrri þingsályktun um fjármálaáætlun 2027–2031. Þar sé sérstaklega lögð áhersla á að dreifa ferðamönnum betur um landið, meðal annars með auknum stuðningi við millilandaflug um aðra flugvelli en Keflavík.
Byggðarráð bendir hins vegar á að á sama tíma sé lagt til að skera niður framlög til Flugþróunarsjóðs.
„Að mati okkar eru framangreind atriði úr þingsályktuninni í mótsögn við hvert annað, þar sem á sömu síðu er lögð áhersla á dreifingu ferðamanna um landið og aukinn stuðning við aðra flugvelli en Keflavík … en framlög til Flugþróunarsjóðs eru skorin niður.“
Í bókuninni segir jafnframt að skilaboð ríkisins um uppbyggingu millilandaflugs á Akureyri séu því „afar óskýr“.
„Uppbygging nýrra flugleiða í millilandaflugi eru langtímaverkefni sem þarfnast fyrirsjáanleika og þar af leiðandi hefði verið farsælla að halda 100 mkr. framlaginu sem veitt var vegna ársins 2026 áfram inni í framlögum til málaflokksins.“
Helena segir sveitarfélögin hafa lýst þessum sjónarmiðum áður.
„Í vor lögðu sveitarfélögin á Norðurlandi fram sameiginlega áskorun um að ríkið kæmi betur að rekstri og markaðssetningu Akureyrarflugvallar, líkt og það gerir gagnvart Keflavíkurflugvelli.“
Hún segir að samþykkt Alþingis um fjármálaáætlun hafi valdið vonbrigðum.
„Þann 15. júní var samþykkt þingsályktun um fjármálaáætlun 2027–2031 þar sem kemur fram að ekki verður framhald á 100 milljóna króna viðbótarframlagi til Flugþróunarsjóðs. Það þótti okkur miður og ekki samræmast öðrum áherslum sem birtast á sömu síðu í þingsályktuninni. Okkur þótti því mikilvægt að minna á fyrri áskorun sem og að gagnrýna samþykkta ályktun Alþingis og það sem hún boðar gagnvart millilandafluginu um Akureyrarflugvöll.“
Byggðarráð ítrekar jafnframt fyrri áskorun sveitarfélaga á Norðurlandi um að ríkið komi rekstri, uppbyggingu og markaðssetningu Akureyrarflugvallar fyrir hjá sérstakri stjórn eða félagi sem hafi það markmið að þróa flugvöllinn sem eina af alþjóðlegum gáttum Íslands. Jafnframt sé nauðsynlegt að tryggja bæði þeirri starfsemi og Flugþróunarsjóði fullnægjandi fjármögnun.
Helena telur jafnframt að núverandi fyrirkomulag skapi mismunun milli landshluta.
„Þarna má segja að það ríki ekki jafnræði á milli landshluta þar sem mér vitanlega koma sveitarfélög á suðvesturhorninu ekki að fjármögnun sambærilegrar markaðssetningar á Keflavíkurflugvelli og sveitarfélögin á Norðurlandi gera varðandi markaðssetningu Akureyrarflugvallar.“
Flugklasinn Air 66N hefur frá árinu 2010 unnið að því að markaðssetja Akureyrarflugvöll sem alþjóðlegan áfangastað. Á undanförnum árum hefur sú vinna meðal annars skilað reglulegu beinu millilandaflugi frá Bretlandi, Hollandi og Sviss auk sérferða frá fleiri löndum.
