Boðaðar breytingar á virðisaukaskattsumhverfi skemmtiferðaskipa í hringsiglingum hafa vakið hörð viðbrögð víða um land. Frá og með næsta sumri vilja skattyfirvöld leggja virðisaukaskatt á alla þjónustu og hafnargjöld sem tengjast skemmtiferðaskipum í hringsiglingum við Ísland.
„Þetta væri enn ein atlagan að ferðaþjónustu á landsbyggðunum,“ segir Eiður Pétursson, formaður hafnarnefndar Norðurþings í samtali við Husavik.com.
Sigurður Jökull Ólafsson, framkvæmdastjóri Cruise Iceland, segir mikla vinnu hafa farið í að endurbyggja traust við útgerðir skemmtiferðaskipa vegna mikilla breytinga á gjaldaumhverfi skemmtiferðaskipa og því mikilvægt að það séu skýrar línu framundan og rammi sem er hægt að vinna eftir mörg ár fram í tíman, ekki nokkra mánuði í senn eins og nú.
„Við erum að bíða eftir nánari svörum frá skattinum og það er verið að skoða hvernig er hægt að finna farsæla lausn á þessu. Réttmætar væntingar hafa skapast gegnum tíðina að tollfrelsið og virðisaukaskattur séu nátengd mál, þannig að tollfrelsið hafi tilhlíðileg áhrif. Við erum í samtali við þingmenn og stjórnsýslu að skoða alla anga þessa máls núna en stöðug óvissa er að valda tjóni,“ segir Sigurður Jökull.
Vara við neikvæðum áhrifum
Á vef Hafnasambands Íslands kemur fram að sambandið varar við áhrifum þeirra margþættu breytinga sem gerðar hafa verið á skattaumhverfi skemmtiferðaskipa á undanförnu. Í umsögn til Alþingis vegna frumvarps til laga í tengslum við fjárlög 2026 segir að stjórnvöld hafi þá boðað eða innleitt þrjár breytingar á skattalegu umhverfi greinarinnar.
Hafnasambandið telur að breytingarnar muni hafa neikvæð áhrif á hafnir landsins, tekjur hins opinbera og ferðaþjónustu almennt. Sérstaklega er bent á að hafnir á landsbyggðinni treysti í ríkum mæli á komur skemmtiferðaskipa, bæði beint og óbeint, þar sem þjónustuaðilar á svæðinu njóta góðs af.
Óvissa fyrir komandi tímabil
Aðilar innan greinarinnar segja að þegar hafi orðið breytingar á bókunum og að skipafélög horfi til annarra áfangastaða. Þá er bent á að Ísland keppi við aðra norðlæga áfangastaði þar sem skattalegt umhverfi sé fyrirsjáanlegra.
Eiður Pétursson segir mikilvægt að stjórnvöld horfi til heildaráhrifa á byggðir landsins. „Við höfum byggt upp öfluga þjónustu í kringum komur skemmtiferðaskipa og það skiptir miklu fyrir atvinnulíf og tekjur sveitarfélaga að stöðugleiki ríki í rekstrarumhverfinu,“ segir hann.
Hafnasamband Íslands vonast til að farsæl niðurstaða náist áður en næsta sumartímabil hefst, enda sé brýnt að tryggja fyrirsjáanleika fyrir bæði hafnir og ferðaþjónustuaðila um land allt.
