Norðurþing hefur sett sér nýja menntastefnu sem gildir fyrir árin 2026 til 2031. Stefnan leysir af hólmi eldri skólastefnu sveitarfélagsins. Vinna við gerð stefnunnar hófst í byrjun árs 2025 og var það stýrihópur á vegum fjölskylduráðs, með ráðgjöf frá Ásgarði skólaráðgjöf, sem leiddi vinnuna.
Menntastefnan nær til leikskóla, grunnskóla og tónlistarskóla í Norðurþingi og er sérstök áhersla lögð á læsi sem hornstein náms, auk sjálfbærnimenntunar, velferðar, persónumiðaðs náms og öflugs samstarfs við foreldra og samfélagið. Þá er kveðið á um heildstæða og þrepaskipta þjónustu í þágu farsældar barna.
Skólamál í Norðurþingi hafa verið mikið í umræðunni síðustu mánuði, bæði eftir að Grunnskóla Raufarhafnar var lokað vegna skorts á starfsfólki og nemendur fluttir í Öxarfjarðarskóla og eins í kjölfar þess að verkefnið Lítil skref til læsis hlaut Íslensku menntaverðlaunin úr hendi forseta Íslands.
Í nýju stefnunni eru sett fram níu meginmarkmið sem munu leiða skólastarf næstu ár. Þar er meðal annars lögð áhersla á snemmtækan og samþættan stuðning, að rödd barna heyrist og að unnið sé í anda Barnasáttmálans og heimsmarkmiða Sameinuðu þjóðanna. Innleiðing fer fram í gegnum innra mat skólanna, þar sem markmið verða rýnd reglulega og umbætur gerðar eftir þörfum.
